دريم تيم الريال وكتب الفيفا لنا ! ..
24 أكتوبر 2009:
محمد خلف الشمري
--------------------------------------------------------------------------------
بنهائي كأس الاتحاد الاسيوي المنتظر يكون المنطق قد فرض وجوده بتأهل فريقين من الدولتين اللتين اسقطهما الاتحاد الاسيوي من حساباته ببطولة دوري ابطال اسيا لكرة القدم لهذا العام .. علما بأن الدولتين بالبطولات الاخيرة لم تغب شمس فرقها عن الادوار النهائية بس واشنقول هذا الاتحاد الاسيوي وهذي معاييره اللي يبيها .. على العموم تأهل الكويت والكرامة للنهائي يثبت انهما الأعلى كعبا بين فرق كأس الاتحاد الاسيوي وهذا دلاله واضحه بأن الدوري الكويتي والسوري مكانهم الصحيح دوري ابطال اسيا وليس بطولة كاس الاتحاد الاسيوي الضعيفة وخير دليل وين ابطالها السابقين ؟ .. وين فرق الاردن والبحرين اللي سيطرت على البطولة بالسنوات الاخيرة؟ اشوف فرق الكويت وسوريا مسحتهم من خريطة كأس الاتحاد الاسيوي من اول مشاركة .. ولعل هذا النهائي المنتظر رسالة للاتحاد الاسيوي لارجاع الحق لاهله بدلا من فرق دخلت وطلعت محد دري عنها .. وبالاخير مع تمنياتي للكويت بتحقيق البطولة لو انها ماتشفي العلة بس شي احسن من لاشي! .
اللي يلاحظ وضعنا الرياضي هاليومين يحس من وراه ان العمة فيفا قامت تتخبط كل يوم لها رأي .. وعلى قولة ابو حميد الفيفا اليومين دول مايكسرش بخاطر حد اللي يرسله كتاب يرد عليه بمثله .. فكسات رايحة وفكسات جاية وكل هذا على حساب سمعة الكويت تملي صار التعامل معاه زي التعامل مع واحد صايع فاهم الفولة من اولها لآخرها مش عاوز يخسر حد منهم .. رديت عليه وقلت وانت الصاج يابو حميد : حال الفيفا ذكرني بالمثل اللي يقول «مع المغنين مغني ومع المصلين مصلي» والووو يافيفا يا تصلون يا تغنون الاثنين ما مهضومه بالمرة! .
عزيزي القارئ خدعوك وخدعتنا الملايين وقالوا ان الملكي الابيض هو الدريم تيم .. معقولة فريق يوصفونه بالدريم تيم يدخل مرماه خمس اهداف خلال اربعة ايام وعلى ارضه بالبرنابيو ومن فرق اقل من مستواه مع احترامي لميلان وشيبانه اللي اكل عليهم الدهر وشرب ؟ .. معقولة ياناس دريم تيم دفاعه شوربة وبأول اختبار جدي له في ظل عدم ظهور حارس مرماه كاسياس بمستواه الحقيقي يصير حاله جذي .. والله حرام كل هالمبالغ مدفوعة للاعبين كل مميزاتهم هجومية ماعندهم القدرة على انقاذ الفريق في حالة الشدة .. وبالوقت نفسه ادارة نادي القرن اللي رفعة قيمة سوق الاحتراف لرقم صعب تستخسر جلب مدافعين على مستوى عال .. سنيور منك له اللي يبي واحد بطولة لازم يدفعوا فلوس كثير علشان واحد دفاع كويس .. على الاقل شوفوا برشلونه شيسوي سو مثله .. بس الظاهر ان اهل الملكي كل تفكيرهم بسوق الاعلان والكسب المادي وغير هذا مو مهم !.
صحيفة عالم اليوم الكويتية :
